Xorazmda temiryo‘l idorasiga ishga kiritish uchun pora olgan shaxs ushlandi
Holat yuzasidan tergovga qadar tekshiruv boshlangan.
Xorazm viloyatining Urganch tumanida fuqaro temiryo‘l idorasiga ishga kiritish uchun pora olgan vaqtida qo‘lga tushdi. Bu haqda IIV Transport va turizm obyektlarida xavfsizlikni ta’minlash departamenti xabar berdi.
Joriy yilning 30-avgust kuni Xorazm viloyati IIB Transportda XTB boshlig‘i nomiga S.S. ismli shaxs ariza bilan murojaat qilib, Urganch temir yo‘l tashkilotida ishlovchi «A» ismli shaxs o‘zining mansabdor tanishlari orqali uni temiryo‘l idoralaridan biriga ishga kiritib qo‘yish evaziga 3000 AQSH dollari pul talab qilayotganligini yozib, unga nisbatan qonuniy chora ko‘rishni so‘ragan.
Arizaga asosan o‘tkazilgan tadbir davomida 1996-yilda tug‘ilgan Xorazm viloyati Urganch tumanida yashovchi R.A. arizachi fuqaro S.S.dan kelishilgan 3000 AQSH dollar pullarni Urganch shahridagi «Javohir» choyxonasida olgan vaqtida ushlangan.
Hozirda mazkur holat yuzasidan tergovga qadar tekshiruv harakatlari olib borilmoqda.
