O‘zbekistonda fuqaroni IIBga olib borish amaliyotidan voz kechiladi
Bu bo‘yicha Hukumat qarori qabul qilindi.
Ichki ishlar organlari patrul-post xizmati saf bo‘linmalari xodimlari tomonidan jamoat joylarida fuqarolarni elektron identifikasiya qilish tartibi to‘g‘risidagi nizom tasdiqlandi. Bu haqda bugun, 22-iyul kuni Hukumatning 399-sonli qarori qabul qilindi.
Qarorga muvofiq, 2023 yil 1 yanvardan “E-patrul” tizimi bosqichma-bosqich joriy etiladi va fuqaroni shaxsini aniqlash uchun ichki ishlar bo‘limiga olib borish amaliyotidan voz kechiladi. Barcha ma’lumotlar elektron tekshiriladi va patrul-post xodimi faoliyati “bodikamera”ga tasvirga olinadi.
Nizomga ko‘ra, xodimlar quyidagi hollarda fuqaroni to‘xtatishi va shaxsini tasdiqlovchi hujjatlar yoki “E-patrul” tizimi orqali ularning shaxsini aniqlashi mumkin:
—shaxs jinoyat yoki huquqbuzarlik sodir etgan yoxud qidiruvda deb gumon qilishga asos bo‘lsa;
—shaxsni sodir etilgan jinoyat yoki huquqbuzarlik haqida ma’lumotga ega deb hisoblash mumkin bo‘lsa;
—shaxsni ushlab turishga boshqa qonuniy asoslar bo‘lsa.
Xodim shaxsni to‘xtatganda uni to‘xtatganlik sabablari va asoslarini tushuntirishi shart. Yonida shaxsini tasdiqlovchi hujjati bo‘lmagan fuqaro quyidagi hollarda ichki ishlar organiga olib boriladi:
—uning shaxsini planshet orqali aniqlash imkoni bo‘lmaganda;
—qidiruvda bo‘lgan yoki bedarak yo‘qolgan shaxslar aniqlanganda;
—shaxsiga aniqlik kiritish jarayonida qarshilik ko‘rsatganda;
—jamoat joyida huquqbuzarlik sodir etish vaqtida ushlanganda.
