Anomal issiq sabab O‘zbekistonda poyezdlar tezligiga cheklov kiritildi
Shuningdek, ayrim yo‘lovchi poyezdlar harakat jadvaliga o‘zgartirish kiritilgan.
O‘zbekistonda anomal issiq kuzatilayotgani sababli poyezdlar tezligiga cheklov kiritiladi. Bu haqda “O‘zbekiston temir yo‘llari” AJ xabar qildi.
Avvalroq “O‘zgidromet” joriy yilning 25–29-iyun kunlari O‘zbekiston hududiga Turkmaniston orqali Eron hududlaridan issiq havo kirib kelishini ma’lum qilgandi. Hozirda issiq havo massalari kirib kelishda davom etmoqda.
Bunday issiq havo paytida po‘lat izlardagi harorat yanada yuqori bo‘ladi. Shu bois, harakat xavfsizligini ta’minlash maqsadida anomal issiqlik tufayli poyezdlar tezligiga cheklov belgilangan. Shu sababli poyezdlar belgilangan manzillarga kechikib borish holatlari kuzatiladi.
Bundan tashqari, havo haroratining keskin ko‘ratilishi tufayli ayrim yo‘lovchi poyezdlar harakat jadvaliga o‘zgartirish kiritilgan.
Xususan, bugun:
—Toshkent–Buxoro yo‘nalishida harakatlanadigan 10-sonli Sharq poyezdi;
—Toshkent–Samarqand yo‘nalishida harakatini amalga oshirayotgan 768F-sonli;
—Buxoro–Toshkent yo‘nalishida harakatlanadigan 765 hamda 769 sonli“Afrosiyob” zamonaviy poyezdlari;
—Xiva–Andijon yo‘nalishida harakatlanadigan 656 sonli;
—Xiva–Buxoro yo‘nalishida harakatlanadigan 50-sonli;
—Toshkent–Qo‘ng‘iroq yo‘nalishida harakatlanadigan 54-sonli yo‘lovchi poyezdlari manziliga harakat jadvalidan kechikib borishi kuzatilmoqda.
