Eron Hormuz bo‘g‘ozini yana yopdi
AQSh Eron portlariga nisbatan bosim choralarini saqlab qolgan.
Eron rasmiylari Hormuz bo‘g‘ozi yana mamlakat qurolli kuchlarining qat’iy nazorati ostiga olinganini ma’lum qildi.
Associated Press agentligi xabariga ko‘ra, Eron Birlashgan kuchlar qo‘mondonligi AQSh tomonidan Eron portlariga nisbatan blokada davom etayotgan sharoitda Hormuz bo‘g‘ozi orqali yuk tashish harakatlariga cheklovlar qo‘yilishi mumkinligidan ogohlantirgan.
Bayonotda ta’kidlanishicha, agar Qo‘shma Shtatlar Eron portlariga bosim siyosatini davom ettirsa, bo‘g‘oz orqali xalqaro tranzit harakatiga to‘sqinlik qilinishi ehtimoli mavjud.
Avvalroq AQSh prezidenti Donald Tramp Eron portlariga nisbatan blokada saqlanib qolishini va bu choralar Tehronning yadroviy dasturi bo‘yicha kelishuvga erishilgunga qadar davom etishini bildirgan edi.
17-aprel kuni Eron Hormuz bo‘g‘ozini tijorat kemalari uchun ochayotganini ma’lum qilgan edi. O‘sha paytda rasmiy Tehron bu qarorni mintaqadagi sulh jarayonlari bilan izohlagan va bo‘g‘oz sulh davomida ochiq bo‘lishini bildirgan.
Hormuz bo‘g‘ozi global neft yetkazib berish yo‘nalishlarining eng muhim strategik nuqtalaridan biri hisoblanadi. Shu bois undagi har qanday cheklov xalqaro energetika bozorlariga sezilarli ta’sir ko‘rsatishi mumkin.
