Avstraliyadagi yirik neftni qayta ishlash zavodida yong‘in yuz berdi

Avstraliyadagi yirik neftni qayta ishlash zavodida yuz bergan yong‘in mamlakatda yonilg‘i ta’minoti bilan bog‘liq xavotirlarni kuchaytirdi. Bu haqda BBC xabar berdi.

 

Ma’lum qilinishicha, Melburndan janubi-g‘arbda joylashgan Gilong shahridagi Viva Energy kompaniyasiga qarashli Corio neftni qayta ishlash zavodida 16-aprelga o‘tar kechasi yong‘in sodir bo‘ldi. Favqulodda xizmatlar portlash va alangalar haqidagi xabarlardan so‘ng hodisa joyiga yetib borgan.

 

Yong‘in 13 soat davom etib, payshanba kuni o‘chirildi. Hodisa vaqtida zavod hududida bo‘lgan o‘nlab ishchilar evakuatsiya qilingan. jabrlanganlar yo‘q.

 

Mazkur zavod Viktoriya shtati yoqilg‘isining qariyb 50 foizini, mamlakat bo‘yicha esa 10 foizini ishlab chiqaradi. Hozirda u qisman faoliyat yuritmoqda, biroq hukumat benzin ishlab chiqarish hajmiga ta’sir bo‘lishi mumkinligini bildirdi.

 

Avstraliya energetika vaziri Chris Bowen yong‘in global yoqilg‘i inqirozi sharoitida yuz berganini ta’kidladi. Uning so‘zlariga ko‘ra, Eronda urush boshlangach, mamlakatda yoqilg‘i ta’minoti allaqachon bosim ostida qolgan.

 

So‘nggi haftalarda dizel narxlari keskin oshib, ayrim hududlarda yoqilg‘i tanqisligi va vahimali xaridlar kuzatilmoqda. Aviakompaniyalar esa aviayoqilg‘i narxi ko‘tarilgani sabab ayrim reyslarni qisqartirmoqda.

 

Dastlabki ma’lumotlarga ko‘ra, yong‘inga uskunadagi nosozlik sabab bo‘lgan. Hodisa yuzasidan tergov ishlari olib borilmoqda.

 

Viva Energy bosh direktori Scott Wyatt yong‘in benzin ishlab chiqarishning ikki bo‘linmasiga zarar yetkazganini, boshqa qismlar esa saqlanib qolganini ma’lum qildi. Uning aytishicha, xavfsizlik chorasi sifatida benzin, dizel va aviayoqilg‘i ishlab chiqarish vaqtincha kamaytirilgan.

 

Mutaxassislar Avstraliya asosan Singapur, Janubiy Koreya va Malayziyadan import qilinadigan yoqilg‘iga tayanishini bildirib, bu holat qisqa muddatda ta’minot uzilishlarini yumshatishi mumkinligini qayd etmoqda. Biroq ular mavjud zaxiralar xavf ostida qolayotganini ham ta’kidlamoqda.

 

Gilong shahri meri Stretch Kontelj ushbu hodisani “misli ko‘rilmagan” deya baholab, uning sanoat uchun katta zarba bo‘lganini bildirdi.

Avvalroq Avstraliya hukumati global iqtisodiy bosimlardan aholini to‘liq himoya qila olmasligini bildirgan edi.