Xorijiy tilda ta’lim olgan talabalar uchun magistraturada til sertifikati talab qilinmaydi

O‘zbekistonda magistratura va doktoranturaga qabul tizimida muhim o‘zgarish joriy etilmoqda.Mazkur tartib 2026-yil 10-aprelda qabul qilingan oliy ta’limni takomillashtirishga oid prezident farmonida belgilandi.

 

Ma’lum qilinishicha, endilikda ta’lim dasturini xorijiy tilda tamomlagan talabalar uchun til sertifikati talabi bekor qilinadi. 

 

Xorijiy tillar yo‘nalishida C1 daraja, aniq fanlar, jurnalistika, huquq, axborot-kommunikatsiya texnologiyalari hamda iqtisodiyot yo‘nalishlarida B2 darajadagi sertifikat talabi amal qiladi.

 

Farmonga ko‘ra, 2027-yil 1-yanvardan boshlab oliy ta’lim muassasalari milliy reyting natijalariga qarab moliyaviy rag‘batlantiriladi. Baholash mezonlari sifatida akademik va ilmiy faoliyat, xalqaro hamkorlik, raqamlashtirish darajasi hamda bitiruvchilarning bandlik ko‘rsatkichlari olinadi.  Reyting tizimini yuritish tartibi Ta’lim sifatini ta’minlash milliy agentligi tomonidan belgilanadi.

 

Shuningdek, Innovatsion rivojlanish agentligi tomonidan o‘tkaziladigan tanlov asosida 10 ta oliy ta’lim muassasasiga milliy tadqiqot universiteti maqomi berilishi rejalashtirilgan.

 

Farmonga muvofiq, davlat oliygohlarida to‘ldirilmay qolgan grant o‘rinlari hisobidan har yili 500 nafargacha iqtidorli xorijlik talabalar uchun “Yangi O‘zbekiston stipendiyasi” dasturi joriy etiladi.

 

Bundan tashqari, 2026/2027-o‘quv yilidan boshlab xorijiy talabalarni o‘qishga qabul qilish “Study in Uzbekistan” platformasi orqali amalga oshiriladi. Qabul shartlari va tartibi esa oliy ta’lim muassasalari tomonidan mustaqil belgilanadi.