Prezident saylovi bo‘yicha AQSH munosabat bildirdi
AQSHning O‘zbekistondagi elchixonasi 9-iyul kuni bo‘lib o‘tgan prezidentlik saylovlarini bevosita kuzatdi.
AQSHning O‘zbekistondagi elchixonasi 9 iyul kuni bo‘lib o‘tgan prezidentlik saylovlar bo‘yicha bayonot berdi va Shavkat Mirziyoyevning islohotlar dasturini qo‘llab-quvvatlashini eʼlon qildi.
«AQSH elchixonasi O‘zbekiston vatandoshlarini saylovdagi ishtiroki uchun olqishlaydi hamda saylovda Prezident Mirziyoyevni qo‘llab-quvvatlaganliklarini qayd etadi. Prezident Mirziyoyev yangi vakolatlari doirasida o‘z vazifasini bajarishga kirishar ekan, Qo‘shma Shtatlar uning islohotlar va boshqaruv tizimini takomillashtirish, jumladan, qonun ustuvorligi, hokimiyat tarmoqlari o‘rtasidagi o‘zaro nazorat va muvozanatni taʼminlash, shaxsiy huquqlarni himoya qilish kabi kun tartibida turgan masalalarni ilgari surishda yordam berishga tayyorligini bildiradi», — deyiladi bayonotda.
«Demokratik tizimlar saylov jarayonlarining yaxlitligini taʼminlashdan tashqari, ovoz berishda qatnashayotgan vatandoshlarni haqiqiy, raqobatbardosh tanlash imkoniyati bilan ham taʼminlashi lozim. Amerika Qo‘shma Shtatlari O‘zbekiston hukumatini kelgusi saylovlarda DIIHBning tavsiyalarini to‘liq bajarishga chaqiradi», — qayd etilgan bayonotda.
