Turkiyada 6-fevraldan buyon 22,5 mingga yaqin zilzila qayd etildi
AFAD rahbari zilzilalar mintaqada yashovchi 15 millionga yaqin fuqaroga bevosita taʼsir ko‘rsatganini taʼkidladi.
6 fevraldan buyon, yaʼni epitsentri Turkiya Qahramanmarashida sodir bo‘lgan halokatli zilzilalardan so‘ng 22,5 mingga yaqin yerosti silkinishlari sodir bo‘ldi. Bu haqda Turkiya Favqulodda vaziyatlarni boshqarish va oldini olish boshqarmasi (AFAD) rahbari Yunus Sezer Turkiya ilmiy-texnikaviy tadqiqot kengashi (TUBITAK) tomonidan onlayn tarzda tashkil etilgan zilzilalarni o‘rganish bo‘yicha konferensiyada so‘zlagan nutqida maʼlum qildi.
Unga ko‘ra, 6 fevral kuni Qahramanmarashda sodir bo‘lgan zilzilalar 1668 yilda Shimoliy Anadoluda va 1939 yilda Erzinjonda sodir bo‘lgan shunga o‘xshash ofatlardan keyin uchinchi yirik zilzilalar bo‘ldi. Bu taʼsir maydoni, vayronagarchilik va odamlarning halok bo‘lishi nuqtai nazaridan eng katta ofat bo‘ldi.
AFAD rahbari zilzilalar mintaqada yashovchi 15 millionga yaqin fuqaroga bevosita taʼsir ko‘rsatganini taʼkidladi.
«7,7 magnitudali birinchi zilzila davomiyligi 65 soniya, 7,6 magnitudali ikkinchi zilzila esa 45 soniyani tashkil etdi. Ayni damda 22,5 mingga yaqin yer silkinishlari qayd etilgan. Bu ko‘rsatkich AFAD tomonidan yil davomida qayd etilgan o‘rtacha zilzilalar soniga teng. 5 balldan 6 ballgacha bo‘lgan silkinishlar soni 47 tani tashkil etadi. Ikkala zilzila natijasida 400 km ga yaqin yer usti yorilishi sodir bo‘lgan, yer qobig‘ida 7,5 metrgacha siljishlar yuzaga kelgan», — dedi Sezer.
Unga ko‘ra, Qahramonmarashda epitsentrlari bo‘lgan zilzilalar natijasida 56 426 ta bino vayron bo‘lgan yoki zudlik bilan buziladi, 206 452 ta bino jiddiy, 48 984 tasi o‘rta va 516 352 tasi yengil shikastlangan.
Sezer, qidiruv-qutqaruv ishlari ortidan birinchi bosqichda mintaqaga 160 ming chodir yuborilganini qayd etdi. Ayni paytda 610 mingga yaqin chodir o‘rnatildi, 289 ta konteyner maydoniga 45 ming konteyner joylashtirildi.
«Birinchi bosqichda zilzila zonasidagilarning 2 million 800 ming nafari, ayni paytda 2,5 million kishi joylashtirildi. Yana 800 ming zilziladan zarar ko‘rgan kishilar mintaqadan tashqariga joylashtirildi», — deya qo‘shimcha qildi Sezer.
