O‘zbekiston Turkiyaga "modulli uy"lar jo‘natadi
Turar-joy konteyner inshooti Hatay viloyatidagi Ovakent qishlog‘iga o‘rnatiladi.
“Anadolu” agentligining xabar berishicha, fevral oyida epitsentri Qahramonmarashda bo‘lgan halokatli zilzilalardan so‘ng Turkiyaga yordam qo‘lini cho‘zgan O‘zbekistonning xayriya yordami doirasida jo‘natiladigan har birida bir oila sig‘adigan 100 ta turar-joy konteyner inshooti Hatay viloyatidagi Ovakent qishlog‘iga o‘rnatiladi. Modulli uylar Istanbuldagi o‘zbek diasporasi tomonidan 2016 yilda tashkil etilgan Seyhun taʼlim va madaniyat uyushmasining bevosita ko‘magida o‘rnatilmoqda.
Ushbu modulli uylarning umumiy maydoni 21 metr kvadrat bo‘lib, unda oshxona, hojatxona va hammom mavjud. Konteynerlar issiqlik izolyatsiyasi bilan jihozlangan va turli mavsumiy omillarga chidamli. Ularni o‘rnatish 15 kishidan iborat jamoa tomonidan amalga oshiriladi.
«Ovakent hududida 100 ta konteyner o‘rnatishni rejalashtirganmiz. Ayni paytda 80 dan ortiq konteyner o‘rnatish uchun qurilish materiallari mavjud. Konteynerlarimizning o‘ziga xos jihati shundaki, ular murvat bilan mahkamlangan, yaʼni istak bo‘lsa yig‘ilib, ko‘chirilishi mumkin bo‘lgan tarzda ishlab chiqilgan», — deydi Uyushma rahbari Tohir Abdulla.
Uning qo‘shimcha qilishicha, Ovakentda konteyner o‘rnatish ishlari 15 kun ichida yakunlanishi rejalashtirilmoqda.
