Surxondaryoda qo‘lbola usulda paxta yog‘i ishlab chiqargan 76 yoshli otaxon sudlandi
U bundan avval ham xuddi shunday jinoyatda ayblanib, 1,5 yilga ozodlikdan cheklash jazosi tayinlangan.
Jinoyat ishlari bo‘yicha Denov tuman sudida muqaddam sudlangan 76 yoshli shaxsga nisbatan jinoyat ishi ko‘rib chiqildi. Bu haqda IIV Matbuot xizmati xabar bermoqda.
Maʼlum qilinishicha, 76 yoshli otaxon qonunga xilof ravishda moyjuvozda yog‘ ishlab chiqarishni yo‘lga qo‘ygan.
Huquq-tartibot idoralari xodimlari tekshiruv chog‘ida 15 kilogramm paxta yog‘i, 41 kilogramm chigit mahsuloti va qo‘lbola jihozlar topdi.
Sud chog‘ida maʼlum bo‘lishicha, sudlanuvchi avval ham xuddi shunday jinoyatda ayblanib, unga 1,5 yilga ozodlikni cheklash jazosi tayinlangan. Ammo, u jazo tugashidan 11 oy oldin shartli ravishda ozodlikka chiqarilgan.
Sud otaxonga JKning tegishli moddalari bilan 4 yil ozodlikdan mahrum qilish jazosini tayinladi. Ammo sudlanuvchi suddan yengillik so‘ragani va uning yoshini hisobga olib, unga ikki yillik sinov muddati berildi. Agar qoidabuzarlik takrorlansa, u to‘rt yilga ozodlikdan mahrum qilinadi.
