BMT Suriyaga gumanitar yordam yetkazdi
Mamlakatda 2011-yildan buyon urush to‘xtagani yo'q.
BMT Suriyaga 73 ta yuk avtomobilida gumanitar yordam jo‘natdi. Bu haqda “Anadolu” agentligi xabar berdi. Ushbu yordam karvoni Turkiya orqali olib o‘tilgan. Uning Idlib aholisi uchun mo‘ljallangani aytilmoqda.
Idlib Suriya hukumat kuchlari va qurolli muxolifat hamda turli radikal guruhlar o‘rtasida jangovar harakatlar olib borilayotgan so‘nggi yirik shahar bo‘lib qolmoqda. Rasmiy Damashqni Rossiya kuchlari, Idlibdagi ayrim guruhlarni Turkiya qo‘llab-quvvatlaydi. Idlibda o‘ta og‘ir gumanitar vaziyat shakllangan.
Suriyada 2011-yildan buyon fuqarolar urushi tinmayapti. BMT maʼlumotlariga ko‘ra, qurolli nizo oqibatida 400 ming kishi halok bo‘lgan. 10 milliondan ortiq suriyalik o‘z uylarini tashlab ketdi. Ularning 4.8 millioni xorijiy davlatlardan boshpana topdi.
Avvalroq Iroq Suriya bilan chegarada devor qurishi to‘g‘risida xabar berilgandi.
