Braziliya dahshatli toshqin girdobida
Mamlakatning 100 ta shahrida favqulodda holat e’lon qilindi.
Braziliya shimoli-sharqidagi Baxiya shtatida kuchli yomg‘irlar oqibatida kelib chiqqan toshqinda kamida 20 kishi halok bo‘ldi, 358 kishi jarohat oldi. Bu haqda “Sinxua” agentligi xabar berdi.
Qayd etilishicha, tabiiy ofat allaqachon jami 470 ming kishiga zarar yetkazgan. Shtatdagi 116 ta shahardan 100 tasida favqulodda holat e’lon qilindi. To‘xtovsiz yog‘ayotgan yomg‘ir ko‘priklar va o‘nlab uylarning qulashiga olib keldi. Ofat keltirgan moddiy zarar hali hisob-kitob qilinmagan.
Braziliya Milliy meteorologiya instituti ma’lumotlariga ko‘ra, janubiy Baxiya shtatida boshlangan kuchli yomg‘ir noyabr oyidan yanvargacha davom etadi. Maranxao, Seara va San-Paulu shtatlari jabrlangan hududlarga yordam berish uchun qutqaruvchilarni yuborishini ma’lum qildi.
Avvalroq “Rai” to‘foni Filippinni vayron qilgani xabar qilingan edi. Ofat 75 kishining umriga zomin bo‘lgan.
