O‘rta Chirchiqda 4 kishi halok bo‘lgan yong‘in yuzasidan jinoyat ishi qo‘zg‘atildi
Hodisa yuzasidan Favqulodda vaziyatlar, elektr tarmoqlari va gaz ta’minoti xodimlari faoliyati yuzasidan xizmat tekshiruvi boshlangan.
Toshkent viloyatining O‘rta Chirchiq tumanida xonadonda sodir bo‘lgan yong‘in va portlash oqibatida 4 kishi vafot etgani yuzasidan jinoyat ishi qo‘zg‘atildi. Bu haqda Bosh prokuratura matbuot xizmati rahbari Hayot Shamsutdinov Zamon.uzga ma’lum qildi.
Ma’lum qilinishicha, 16-aprel kuni soat taxminan 01:40 larda O‘rta Chirchiq tumani “O‘rtaovul” mahallasida joylashgan uyda yong‘in xavfsizligi qoidalari buzilishi sabab portlash sodir bo‘lgan va yong‘in kelib chiqqan.
Fojia oqibatida 30 yoshli erkak hamda uning 6 yoshli o‘g‘li, 3 va 2 yoshli qizlari hodisa joyida halok bo‘lgan. Dastlabki ma’lumotlarga ko‘ra, ular kuyish jarohatlari va is gazidan zaharlanish oqibatida vafot etgan.
Shuningdek, erkakning 27 yoshli turmush o‘rtog‘i va 54 yoshli onasi yong‘indan qutulish maqsadida derazadan sakrab tushgan. Ular turli tan jarohatlari bilan Nurafshon shahri tibbiyot birlashmasiga yotqizilgan.
Mazkur holat yuzasidan tuman prokuraturasi tomonidan Jinoyat kodeksining 259-moddasi (yong‘in xavfsizligi qoidalarini buzish) 2-qismi “a”, “b” bandlari bilan jinoyat ishi qo‘zg‘atilib, tergov harakatlarini olib borish uchun Toshkent viloyati IIBB huzuridagi tergov boshqarmasiga yuborilgan.
Voqea joyidan sud ekspertlari, kriminalistika mutaxassislari hamda favqulodda vaziyatlar boshqarmasi xodimlari tomonidan yong‘indan shikastlangan buyumlar, alyuminiy sim bo‘laklari va boshqa ashyoviy dalillar olingan.
Bundan tashqari, hodisa yuzasidan tuman Favqulodda vaziyatlar bo‘limi, hududiy elektr tarmoqlari korxonasi hamda gaz ta’minoti bo‘limi xodimlarining xatti-harakatlari bo‘yicha xizmat tekshiruvi tayinlangan.
