O‘zbekistonda 2,2 million nafardan ortiq fuqaro o‘ziga kredit olishni taqiqladi

2026-yil 1-aprel holatiga ko‘ra, O‘zbekistonda “Kreditga taqiq” xizmatiga ulangan jismoniy shaxslar soni 2 million 207 ming 753 nafarga yetdi. Bu haqda Kredit-axborot tahliliy markazi xabar berdi.

 

 

Statistik ma’lumotlarga ko‘ra, xizmatdan foydalanuvchilar orasida erkaklar 1 million 283 ming 506 nafarni, ayollar esa 924 ming 247 nafarni tashkil etmoqda.

 

Bu xizmatdan eng ko‘p 26—23 yoshdagilar foydalanmoqda (31 foiz). Undan keyingi o‘rinlarni 26 yoshgacha bo‘lganlar (24 foiz), 36—45 yoshdagilar (24 foiz), 46—55 yoshdagilar (12 foiz), 56 yoshdan yuqorilar (9 foiz) egallagan.

 

Tahlilda keltirilishicha, 2025-yil 1-iyulda “Kreditga taqiq” xizmatidan foydalanuvchilar soni 33 ming kishidan oshgan bo‘lsa, 1-oktyabrda 149 ming kishidan, 2026-yil 1-yanvarda 438 ming kishidan, 1-aprelda esa 2,2 million kishidan oshgan.

 

Mazkur xizmat orqali foydalanuvchilar o‘z nomiga ruxsatsiz kredit rasmiylashtirilishining oldini olishi mumkin.

 

Foydalanuvchilar “Kreditga taqiq” xizmatidan onlayn va oflayn shaklda mustaqil ravishda foydalanib, uni yoqish yoki o‘chirish imkoniyatiga ega. “Kreditga taqiq” xizmatini faollashtirish yoki o‘chirish bir necha usulda amalga oshiriladi. Jumladan, uni onlayn tarzda “KATM” mobil ilovasi, Kredit byurosining rasmiy veb-saytidagi shaxsiy kabinet hamda Yagona interaktiv davlat xizmatlari (my.gov.uz) portali orqali yoqish yoki o‘chirish mumkin.

 

Shuningdek, xizmatdan oflayn tarzda Davlat xizmatlari markazlari yoki Kredit byurosiga bevosita murojaat qilish orqali ham foydalanish imkoniyati mavjud.

 

Qayd etilishicha, “Kreditga taqiq” xizmati mutlaqo bepul bo‘lib, fuqarolarga o‘z moliyaviy xavfsizligini mustaqil boshqarish imkonini beradi.