Soʻxda 2 ming ish o‘rni yaratish rejalashtirmoqda

Prezident Shavkat Mirziyoyev Fargʻona viloyatining Soʻx tumanini ijtimoiy-iqtisodiy rivojlantirish bo‘yicha chora-tadbirlar yuzasidan yig‘ilish o‘tkazdi.

 

Yig‘ilishda ta’kidlanganidek, avvallari hududga yetib borish qiyin, transport va logistika imkoniyatlari cheklangan edi. Soʻnggi yillarda mintaqaviy hamkorlik va siyosiy iroda tufayli hududni kompleks rivojlantirish uchun yangi imkoniyatlar yaratildi: yangi yo‘llar ochildi, chegaradan o‘tish tartiblari soddalashtirildi, zamonaviy maktab, bog‘cha, poliklinika va uy-joylar barpo etildi.

 

Hozirgi kunda Soʻxdagi 25 ta mahallada 88,6 ming aholi yashaydi. Hududda 29 ta maktabgacha ta’lim tashkiloti, 33 ta maktab, 2 ta oʻrta maxsus ta’lim muassasasi, 14 ta sog‘liqni saqlash muassasasi va 2 ta madaniyat obyekti faoliyat ko‘rsatmoqda. O‘tgan yil 13 921 ta ish o‘rni yaratilib, 1 667 ta oila kambag‘allikdan chiqarilgan.

 

Yig‘ilishda joriy yilda Soʻx tumaniga 40 million dollar investitsiya jalb qilish, 15 million dollarlik eksportni ta’minlash rejasi belgilandi. Sanoat, xizmatlar va qishloq xo‘jaligida o‘sish prognozi 7,6–17,1 foizni tashkil etadi.

 

Hududning turizm salohiyatiga alohida e’tibor qaratildi: Soʻxning tabiati, daryolari va salqin iqlimi turizmni rivojlantirish uchun imkoniyat yaratadi. 60 million dollarlik investitsiya jalb qilinib, qariyb 2 ming ish o‘rni yaratiladi, turizm xizmatlari hajmi 15 milliard so‘mga, eksport esa 2 million dollarga oshiriladi.

 

Shuningdek, har bir mahallada 10 tadan jami 300 ta mikroloyiha ishga tushiriladi, 8,6 ming aholi kasb-hunarga o‘qitiladi. Banklar tomonidan 64 milliard so‘m, ijtimoiy va infratuzilma obyektlari uchun esa 74,5 milliard so‘m ajratiladi.

 

Soʻx tumanini rivojlantirishning asosiy maqsadi aholi daromadini oshirish, ish o‘rinlari yaratish va transport-logistika bog‘liqligini kuchaytirishdir. Mutasaddilarga belgilangan vazifalarni bajarish yuzasidan topshiriqlar berildi.