NASA'ning “Artemis II” missiyasi astronavtlari Yerga muvaffaqiyatli qo‘ndi
Qo‘nish jarayonida tashqi harorat 2 760 darajagacha ko‘tarilib, bu qisqa muddatli aloqa uzilishiga sabab bo‘lgan.
NASA'ning “Artemis II” missiyasi doirasida Oy atrofida parvoz qilgan astronavtlar Yerga muvaffaqiyatli qaytib qo‘ndi. Jarayonni NASA’ning You Tube’dagi sahifasida 3 milliondan ortiq odam kuzatdi.
Ma’lumotlarga ko‘ra, “Orion” kosmik kemasi Tinch okeaniga, AQShning Kaliforniya shtati qirg‘oqlari yaqiniga juma kuni mahalliy vaqt bilan 17:07 da (O‘zbekiston vaqti bilan shanba kuni soat 05:07) qo‘ngan. Qo‘nish atmosferaga yuqori tezlikda qayta kirish jarayonidan so‘ng amalga oshgan.
Qutqaruv guruhlari oldindan tayyor holatda bo‘lib, kapsulani tezda xavfsiz holatga keltirish hamda ekipajni evakuatsiya qilish ishlarini boshlagan.
Missiya tarkibida NASA astronavtlari Reyd Vaysman, Viktor Glover va Kristina Kox hamda Kanada vakili Jeremi Hansen ishtirok etgan.
Qayta kirishdan avval missiya qo‘mondoni Reyd Vaysman Yer bilan aloqa vaqtida Oyning yaqinlashib qolganini qayd etgan. Hyustondagi missiya markazi esa bu tarixiy parvozga qayta qaytish zarurligini bildirgan.
Mutaxassislar ta’kidlashicha, “Orion” kapsulasi uchun bu bosqich muhim sinov bo‘lib, u Oyga parvozlar sharoitida ishlashga mo‘ljallangan texnologiyalarni amalda tekshirish imkonini bergan.
Atmosferaga kirish jarayonida kapsula taxminan 13 daqiqalik keskin bosqichni boshdan kechirgan. Tashqi harorat 2 760 darajagacha ko‘tarilib, qisqa muddatli aloqa uzilishiga sabab bo‘lgan. Parashyutlar ochilgach, aloqa qayta tiklangan va kapsula okeanga yumshoq qo‘ngan.
Qutqaruv xizmati xodimlari kapsulani ochib, astronavtlarni xavfsiz holatda olib chiqqan. Ularning holati barqaror ekani, faqat ayrim kichik texnik noqulayliklar qayd etilgani ma’lum qilingan.
NASA vakillariga ko‘ra, ushbu parvoz insoniyatning Oyga qayta uchish dasturi doirasida muhim bosqich bo‘lib, kelgusida rejalashtirilgan “Artemis IV” missiyasiga zamin yaratadi.
Missiya davomida astronavtlar Oy atrofini aylanib chiqib, kelajakdagi parvozlar uchun mo‘ljallangan tizimlarni sinovdan o‘tkazgan. Shuningdek, ular Oyning narigi tomoni va kosmik hodisalarni kuzatish imkoniga ega bo‘lgan.
NASA bu parvozni yarim asrdan ortiq vaqt ichida Oyga inson parvozini qayta tiklash yo‘lidagi eng muhim sinovlardan biri sifatida baholamoqda.
