Samarqanddagi maktabda ayol 1-sinf o‘quvchisiga hujum qildi

Samarqand viloyati, Qo‘shrabot tumanidagi 53-umumta’lim maktabida 1-sinf o‘quvchisining onasi boshqa o‘quvchilarga nisbatan jismoniy va ruhiy zo‘ravonlik qilgani ma’lum bo‘ldi. Holat aks etgan video ijtimoiy tarmoqlarda tarqaldi. Unda ayol sinfda janjal ko‘tarib, ikki bolaga qo‘l ko‘targani va haqorat qilgani aks etgan. Sinfda boshqa bir necha ayollar bo‘lgan, shuningdek, xonaga kirgan erkaklar janjalni to‘xtatishga harakat qilgan.

 

Ma’lum bo‘lishicha, voqea 3-aprel kuni sodir bo‘lgan. Qo‘shrabot tumanida joylashgan 53-umumta’lim maktabining 1-sinf o‘quvchilari maktabda dars mashg‘ulotlari tugagach, maktabdan uylariga ketayotgan vaqtida o‘zaro nizolashgani tufayli 6-aprel kuni o‘quvchi E.H (2018-yilda tug‘ilgan o‘g‘il bola)ning onasi M.Y (1981-yilda tug‘ilgan ayol) maktabga kelib, o‘quv sinfida o‘quvchilar oldida janjal ko‘tarib, go‘yoki o‘g‘li bilan urishgan O.H (2018-yilda tug‘ilgan o‘g‘il bola) va S.R (2018-yilda tug‘ilgan o‘g‘il bola) larni ta’qib etib, urgan va haqorat qilgan. 

 

Hozirda Qo‘shrabot tumani IIB tomonidan ushbu holat yuzasidan tergovga qadar tekshiruv harakatlari olib borilmoqda.

 

Samarqand viloyati Maktabgacha va maktab ta’limi boshqarmasi maktabdagi ta’lim jarayoniga tashqi shaxslarning aralashishi va o‘quvchilarning jismoniy yoki ruhiy sog‘lig‘iga zarar yetkazuvchi harakatlar qat’iyan taqiqlanganini bildirgan. Shu kabi vaziyatlarga maktab mas’ullari yo‘l qo‘ymasligi lozimligini qayd etgan.

 

Ayni paytda mazkur holat huquqni muhofaza qiluvchi organlar tomonidan nazoratga olingan.