“Euronews” rahbari Ekologiya va iqlim o‘zgarishi milliy qo‘mitasi faoliyati bilan tanishdi

 

Euronews rahbari Pedro Vargas David O‘zbekiston Ekologiya va iqlim o‘zgarishi milliy qo‘mitasi faoliyati bilan tanishdi. Bu haqda Ekologiya va iqlim o'zgarishi milliy qo'mitasi matbuot xizmati xabar berdi.

 

Uchrashuv davomida tomonlar axborot hamkorligini kengaytirish, O‘zbekistonning ekologik kun tartibini xalqaro maydonda faol targ‘ib etish, shuningdek, atrof-muhitni muhofaza qilish va iqlim o‘zgarishiga qarshi kurash borasidagi tashabbuslarni keng yoritishga qaratilgan qo‘shma media-loyihalarni amalga oshirish istiqbollarini muhokama qildilar.

 

Shuningdek, global iqlim kun tartibi doirasida O‘zbekiston tashabbuslariga xalqaro hamjamiyat e’tiborini jalb qilish, ekologik madaniyatni oshirish va “yashil” rivojlanish g‘oyalarini ommalashtirish masalalariga alohida e'tibor qaratildi.

 

Uchrashuv yakunida Ekologiya qo‘mitasi raisi Aziz Abduhakimov Pedro Vargas Davidga ekologik tashabbuslarni yoritish hamda xalqaro hamkorlikni rivojlantirishga qo‘shgan hissasi uchun “Tabiat himoyachisi” ko‘krak nishonini tantanali ravishda topshirdi.

 

Tashrif doirasida xorijiy delegatsiya uchun Ekologiya va iqlim o‘zgarishi milliy qo‘mitasi tizimi bo‘ylab tanishtiruv ekskursiyasi ham tashkil etildi. Mehmonlar ekologik holat monitoringi, tezkor vaziyatlarni tahlil qilish va muvofiqlashtirish ishlari olib boriladigan Situatsion markaz faoliyati, shuningdek, tizim tashkilotlarining asosiy yo‘nalishlari bilan yaqindan tanishdi.