Xorijda qiyin ahvolga tushib qolgan o‘zbekistonliklarni qaytarish uchun qariyb 16 mlrd so‘m ajratildi
2025-yilda Migratsiya agentligi tomonidan 22 ta davlatdan 3 709 nafar O‘zbekiston fuqarosi Vatanga qaytarildi.
2025-yil davomida Migratsiya agentligi tomonidan xorijda murakkab moliyaviy va ijtimoiy ahvolga tushib qolgan 3 709 nafar O‘zbekiston fuqarosi 22 ta xorijiy davlatdan Vatanga qaytarildi. Bu haqda agentlik matbuot xizmati xabar berdi.
Mazkur gumanitar tadbirlarni amalga oshirish uchun Migratsiya jamg‘armasidan jami 15 milliard 900 million so‘m mablag‘ ajratildi.
Xususan, 30-iyul — Butunjahon odam savdosiga qarshi kurashish kuni munosabati bilan 30-iyuldan 30-avgustga qadar ilk bor “Vatanga qaytarish” xayriya aksiyasi o‘tkazildi. Ushbu aksiya doirasida xorijda og‘ir ahvolga tushib qolgan 1 300 kishi O‘zbekistonga olib kelindi.
Shuningdek, fuqarolarning sog‘lig‘i bilan bog‘liq holatlarga alohida eʼtibor qaratildi. Jumladan, 66 nafar fuqaro baxtsiz hodisa yoki og‘ir kasallik sababli Vatanga qaytarildi. Ulardan:
- 45 nafari maxsus tibbiy tashish (yotqizilgan holatda),
- 21 nafari esa O‘zbekiston Sog‘liqni saqlash vazirligi shifokorlari nazorati ostida olib kelindi.
Barcha transport, tibbiy, tashkiliy hamda boshqa xarajatlar to‘liq Migratsiya jamg‘armasi mablag‘lari hisobidan qoplangan.
