“Yuventus” va “Chelsi” muhim transferni muhokama qilishdi
Jamoalar futbolchi almashishmoqchi.
“Chelsi” va “Yuventus” rahbarlari hujumchilar Romelu Lukaku va Dushan Vlahovichlarni o‘zaro almashish bo‘yicha kelishuvga erishdi. Bu haqda "Sky Sport" nashri xabar berdi.
Manba bergan xabarga ko‘ra, klublar hozirda futbolchilarning yoshi va narxidagi farq tufayli transfer shartlarini muhokama qilmoqda. 2022/2023-yilgi mavsumda Lukaku “Inter” safida ijara asosida o‘ynagan. Belgiyalik futbolchi “neradzurri” safida barcha musobaqalarda 37 ta o‘yinda maydonga tushib, 14 ta gol urgan va 7 ta golli uzatmaga mualliflik qilgan. Futbolchining “Chelsi” bilan shartnomasi 2026 yilning iyun oyi oxirigacha amal qiladi. Transfermarkt internet portaliga ko‘ra, futbolchining taxminiy narxi 40 million yevroni tashkil qiladi. Vlahovich “Yuventus”ga 2022-yilning yanvarida “Fiorentina”dan o‘tgan edi. O‘tgan mavsumda serbiyalik futbolchi “zebralar” safida barcha musobaqalarda 42 ta o‘yin o‘tkazib, 14 ta gol urdi va 4 ta golli uzatmani amalga oshirgan. Futbolchining Turin klubi bilan shartnomasi 2026-yilning iyun oyi oxirigacha amal qiladi. Transfermarkt internet portaliga ko‘ra, futbolchining taxminiy narxi 70 million yevroni tashkil qiladi.
