Armanistonda Nestle bolalar ozuqasida xavfli toksin aniqlandi
Mahsulot Rossiyadan olingan laboratoriya tahlillari natijalariga asosan xavfli deb baholangan.
Armanistonda NAN brendi ostidagi Nestlé bolalar ovqatining 9,7 tonnasi xavfli deb topilib, yo‘q qilindi. Bu haqda respublika Oziq-ovqat xavfsizligi inspeksiyasiga tayanib, "News" nashri xabar berdi.
Idora ma’lumotiga ko‘ra, mahsulot Rossiyadan olingan laboratoriya tahlillari natijalariga asosan xavfli deb baholangan. Tekshiruvlar davomida quruq, tez eruvchi, sutli va sut-kislotali bolalar ovqati tarkibida xavfli sereulid toksini bo‘lishi mumkinligi aniqlangan. U organizmga tushganda qayt qilish, ich ketishi kabi alomatlarni keltirib chiqarishi mumkin. Mazkur partiya belgilangan tartibda yo‘q qilingan.
Avvalroq, 2026-yil yanvar oyida Nestlé Rossiyada bolalar uchun mo‘ljallangan ayrim quruq sut va davolovchi aralashmalar partiyasini ixtiyoriy ravishda bozordan qaytarib olgan edi. Bu qaror tashqi yetkazib beruvchidan kelgan xomashyoda ham sereulid toksini bo‘lishi ehtimoli bilan izohlangan.
Kompaniya ma’lumotiga ko‘ra, mazkur komponent miqdori juda kam bo‘lib, xavf ehtimoliy xarakterga ega. Mahsulotni qaytarib olish esa global xavflarni kamaytirish siyosati doirasida amalga oshirilgan.
Avvalroq "HiPP" bolalar ozuqasidan ham kalamush zahari topilgan edi. Zahar shikastlangan qadoqlardan aniqlangani aytilgan. Shuningdek, mazkur ozuqani ishlab chiqaruvchisi bu holat tovlamachilik ekanini bildirgan.
