Sobiq IIV o‘rinbosari Bеkmurod Abdullayev garov evaziga ozod etildi
U davlatga yetkazilgan 200 mlrd so‘m zarar to‘liq qoplangach qamoq ehtiyot chorasi garov evaziga o‘zgartirilgan.
Sobiq Ichki ishlar vaziri o‘rinbosari Bеkmurod Abdullayevga nisbatan qo‘llangan qamoqqa olish tarzidagi ehtiyot chorasi garov evaziga o‘zgartirildi. Bu haqda Kun.uz manbalari xabar bermoqda.
Ma’lumotlarga ko‘ra, sud qarori asosida Abdullayev tomonidan davlatga yetkazilgan 200 milliard so‘mdan ortiq zarar to‘liq qoplangan. Ushbu mablag‘lar naqd pul shaklida davlat hisobiga qaytarilgach, unga nisbatan ehtiyot chorasi o‘zgartirilib, garov qo‘llashga qaror qilingan.
Bеkmurod Abdullayev ilgari Mudofaa vazirligi, Ichki ishlar vazirligi hamda Milliy gvardiya tizimlarida turli mas’ul lavozimlarda ishlagan. U 2021-yil aprel oyida Ichki ishlar vaziri o‘rinbosari lavozimiga tayinlangan edi.
2025-yil noyabr oyida u lavozimidan ozod etilgan. 2026-yil yanvar oyida esa unga nisbatan davlat xaridlari tizimidagi moliyaviy qonunbuzilishlar yuzasidan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llangan.
Dastlabki tergov ma’lumotlariga ko‘ra, mazkur ish doirasida vazirlik tizimidagi davlat xaridlari jarayonida 186 milliard so‘m miqdoridagi mablag‘lar talon-toroj qilinganligi yuzasidan qamoqqa olingani ma'lum qilingan.
Jazoni ijro etish departamenti sobiq boshlig‘i, Abdullaev bilan bir vaqtda ishdan olingan Rustam Tursunov qamoqda qolmoqda.
