Suriya va Turkiya yarashishga yaqinmi?
Moskvada ikki davlat mudofaa vazirlari uchrashdi. Bu so‘nggi 11 yilda shunday formatda tashkil etilgan ilk uchrashuv.
Moskvada Rossiya, Turkiya va Suriya mudofaa vazirlarining uch tomonlama uchrashuvi bo‘lib o‘tdi. Eʼtiborlisi, bu Suriya va Turkiya harbiy rahbariyatining 2011-yildan buyon ilk uchrashuvi bo‘ldi.
Turk tomonidan mudofaa vaziri Xulusi Akar va milliy razvedka tashkiloti rahbari Xakan Fidan, Suriya tomonidan mudofaa vaziri Ali Mahmud Abbos ishtirok etgan. Rossiya delegatsiyasiga Sergey Shoygu boshchilik qilgan.
RF mudofaa vazirligi maʼlumotlariga ko‘ra, uchrashuvda Suriya inqirozini hal qilish uchun umumiy yechimlar muhokama qilingan. Shuningdek, terrorchi guruhlarga qarshi kurash masalasi ham ko‘rib chiqilgan.
Suriyada 12 yildan buyon fuqarolar urushi davom etmoqda. RF amaldagi prezident Bashar Asadni qo‘llab-quvvatlasa, Anqara Asadga muxolifatda bo‘lgan guruhlarga ko‘mak berib keladi.
So‘nggi vaqtlarda Turkiya va Suriya yetakchilari uchrashuvi haqida ko‘plab xabarlar tarqaldi. Moskva ikki prezident uchrashuvida vositachi bo‘lishga tayyorligini bildirgan.
