O‘zbek va tojik kinoijodkorlari tomonidan “Jomiy va Navoiy” filmi suratga olinadi
Unda taniqli aktyor Lyuk Besson ham ishtirok etadi.
O‘zbekiston Kinematografiya agentligi va “Tojikfilm” davlat muassasasining “Jomiy va Navoiy” tarixiy filmini yaratish bo‘yicha tuzilgan qo‘shma komissiyasining yakuniy yig‘ilishida film konsepsiyasi ikki davlat mutaxassislari tomonidan ma’qullandi.
Mazkur film Jomiy va Navoiy do‘stligi haqida bo‘lib, ikki davlat o‘rtasida do‘stlik va samimiylik, o‘zaro hamjihatlik va hamkorlik muhitini qayta tiklashga xizmat qiladi.
Taqdimotda Kinematografiya agentligi Bosh direktori Firdavs Abduxoliqov, Tojikiston Respublikasining O‘zbekistondagi Favqulodda va muxtor elchisi Abdujabbor Rahmonzoda, “Tojikfilm” davlat muassasasi direktori Mahmasaid Shoxiyon, shuningdek, ikki davlat olimlari va kinoijodkorlari ishtirok etdi.
O‘zbekiston tomonidan filmga rejissyorlik qilayotgan Furqat Usmonovning ta’kidlashicha, Kinematografiya agentligi bosh direktorii F.Abduxoliqov Toshkent kinofestivali doirasida taniqli aktyor Lyuk Besson bilan muzokara o‘tkazgan.
“Yaqinda bo‘lib o‘tgan Zoom-konferensiya davomida Lyuk Besson O‘zbekiston va Tojikiston yosh rejissyorlari bilan hamkorlik qilish istagini bildirdi va yosh o‘zbek kinoijodkorlarining ishtiyoqidan ilhomlanganligini ta’kidlab o‘tdi. Kelishuvlarga ko‘ra, ssenariy ustida birgalikda ishlaymiz, u loyiha bo‘yicha maslahatchi vazifasini bajaradi. Hozirda u film ssenariysini intiqlik bilan kutmoqda”, — dedi Usmonov.
