Kelishuv bo‘lmasa, Eronga hujumlar qayta boshlanishi mumkin — Tramp
Vashington harbiy salohiyatni kuchaytirayotganini ma’lum qildi.
Donald Tramp AQSh va Eron o‘rtasidagi muzokaralar muvaffaqiyatsiz yakunlangan taqdirda, Vashington Tehronga qarshi harbiy harakatlarni qayta boshlashi mumkinligini ma’lum qildi.
AQSh rahbari bu haqda New York Post nashriga bergan intervyusida bayon qilib, mamlakat harbiy salohiyati yanada kuchaytirilayotganini ta’kidlagan. Uning so‘zlariga ko‘ra, AQSh harbiy kuchlari eng zamonaviy qurol-aslaha bilan ta’minlanmoqda va zarurat tug‘ilganda ulardan samarali foydalanishga tayyor.
Ma’lum qilinishicha, AQSh va Eron delegatsiyalari o‘rtasidagi muzokaralar 11-aprel kuni Islomobod shahrida o‘tkazilishi rejalashtirilgan. Uchrashuv Toshkent vaqti bilan soat 17:00 dan keyin boshlanishi ma'lum qilingan.
Amerika delegatsiyasiga J. D. Vens boshchilik qilmoqda. Uning tarkibiga AQSh prezidentining maxsus vakili Stiv Uitkoff hamda Jared Kushner kirgan. Delegatsiya Islomobodga AQSh harbiy-havo kuchlariga qarashli samolyotlarda yetib kelgan.
Eron delegatsiyasiga esa parlament raisi Muhammad Bagir G'olibaf va tashqi ishlar vaziri Abbos Aroqchi boshchilik qilmoqda.
Mazkur muzokaralar mintaqadagi keskinlikni yumshatish va tomonlar o‘rtasida kelishuvga erishish yo‘lidagi muhim bosqich sifatida baholanmoqda.
