Xorazmlik pedofillarga nisbatan jinoyat ishini ko'rib chiqish vaqtinchalik to'xtatildi
Ayblanuvchilarga nisbatan uy qamog'i jazosi tayinlangan edi.
Xorazm viloyatida ikki mansabdor mehribonlik uyi tarbiyalanuvchilari bilan jinsiy aloqa qilib kelib, buning uchun juda yengil jazo olgani holati apellyatsiya instansiyasida qayta ko‘rib chiqilishi maʼlum qilingandi.
Oliy sudning xabar berishicha, mazkur jinoyat ishi Jinoyat-protsessual kodeksining 19-moddasi (sudda jinoyat ishlarining oshkora ko‘rilishi) talablariga muvofiq mazkur jinoyat ishi yopiq sud majlisida ko‘rib chiqilmoqda.
Toshkent shahar sudi apellyatsiya instansiyasining sud majlisida prokuror sudga iltimosnoma bilan murojaat qilib, Jinoyat-protsessual kodeksining 416-417-moddalari tartibida sudlanuvchilarga yangi ayblov bo‘yicha jinoyat ishi qo‘zg‘atish va boshqa shaxslarni jinoiy javobgarlikka tortish masalasini hal qilish uchun jinoyat ishi hujjatlarini ayblov xulosasini tasdiqlagan prokurorga yuborish to‘g‘risida ajrim chiqarishni so‘ragan.
Qayd etilishicha, apellyatsiya instansiya sudlov hayʼati prokuror iltimosnomasini qanoatlantirib, sudlanuvchilar A. M. va A. K. ga oid jinoyat ishi bo‘yicha ajrim qabul qilib, Xorazm viloyat prokurorining o‘rinbosariga yuborildi va jinoyat ishini ko‘rish 1 oylik muddatga to‘xtatildi.
Maʼlumot uchun, Xorazm viloyati adliya boshqarmasi sobiq boshlig‘i Oybek Masharipov va Yangiariq tumani favqulodda vaziyatlar bo‘limi sobiq boshlig‘i Anvar Quryazov Urganch shahridagi oilaviy mehribonlik uyi tarbiyalanuvchilari bilan jinsiy aloqa qilib kelgan. Natijada Xiva tuman sudi mehribonlik uyi mudirasiga 5,5 yil ozodlikdan mahrum qilish jazosini bergan, ikki davlat amaldoriga esa 1,5 yilga ozodlikni cheklash (tungi vaqtda uyida bo‘lish) jazosi bilan kifoyalangan edi.
