O‘zbekistonda profilaktik hisobda turgan shaxslar soni qisqartirilishi mumkin
Qonun qabul qilinsa, barcha profilaktik hisobda turganlarning 57,6 foizi ro‘yxatdan o‘chiriladi.
Normativ-huquqiy hujjatlar loyihalari muhokamasi portaliga “Huquqbuzarliklar profilaktikasi to‘g‘risida”gi qonun loyihasi joylashtirildi.
Qonun loyihasi huquqbuzarliklar profilaktikasi sohasidagi qonunchilikni unifikasiya qilishga qaratilgan. Jumladan, loyiha bilan “Voyaga yetmaganlar o‘rtasida nazoratsizlik va huquqbuzarliklarning profilaktikasi to‘g‘risida”gi va “Huquqbuzarliklar profilaktikasi to‘g‘risida”gi qonunlar yagona qonunga birlashtirilmoqda.
Bundan tashqari, loyihaga muvofiq, profilaktik hisobga qo‘yiladigan shaxslar doirasi qisqartirilmoqda. Mazkur chorani ayblilik masalasini xal etmasdan turib jinoyat ishi tugatilganda, mayda huquqbuzarlik sodir etgan shaxslarga va boshqa holatlarda qo‘llamaslik belgilanmoqda. Ushbu qonun qabul qilingan taqdirda 368,6 ming nafardan ziyod shaxslarga nisbatan (barcha profilaktik hisobda turganlarning 57,6 foiz) profilaktik hisob bekor qilinadi.
