O‘zbekistonda ichki yonuv dvigatelli yengil avtomobillar sotuvi taqiqlanishi mumkin
Shuningdek, elektron sigaretlarni mamlakatga olib kirishni taʼqiqlash taklif qilindi.
O‘zbekiston Ekologik partiyasidan prezidentlikka nomzod Abdushukur Xamzayev ichki yonuv dvigatelli yengil avtomobillarni sotuvini taqiqlashni taklif qildi. Bu haqda u partiya Markaziy Kengashining plenumida aytib o‘tdi.
Abdushukur Xamzayev o‘zining saylovoldi dasturi doirasida 2030-yildan boshlab O‘zbekistonda ichki yonuv dvigatelli yengil avtomobillarni sotishni hamda chetda olib kirishni ta’qiqlash kabi tashabbuslarni ilgari surdi.
Shuningdek, u ijtimoiy sohada davlat stomatologik klinikalarini rivojlantirish, shaharlar bosh rejalarini tuzishda kamida 30 foizli yashil maydonlar yaratish talabini mustahkamlash, shaharsozlik faoliyatida jamoatchilik nazoratini kuchaytirish, normativ hujjatlarni qabul qilishda atrof-muhitga ta’sirini baholash tizimini joriy etish, bir martalik ishlatiladigan plastik va polietilen tarkibli idishlardan foydalanishdan bosqichma-bosqich voz kechish hamda elektron sigaretlarni mamlakatga olib kirishni ta’qiqlashni ha taklif qildi.
Bundan tashqari, nomzodning saylovoldi dasturida pestitsidlardan foydalanishdan voz kechishga yo‘naltirilgan “Yashil O‘zbekiston – 2030” dasturini ishlab chiqish hamda yuk tashishni yirik mashinalardan temir yo‘llarga o‘zgartirishga qaratilgan choralar ta‘kidlandi.
